ونعرف تقريبا كل المأكولات لي مشهورة بيها ولايتي (بلدية متوسة ولاية خنشلة) اليوم جبتلكم اكلة سهلة جدا ويقدر أي شخص أنو يطبخها سواء بنت أو ولد
سااااااااااااااااااااااااهلة
شوفو ماعليكم إلا ديرو واش نقول عليه
جيبو مقلة عادية وحطو فيها زيت أو زبدة حسب الرغبة ولكن ماتكثروش قليل فقط قيس ما أنو ماتلصقش ومن بعد حطو عليه شوية غرس أكيد معروف (تمر مرحي) لي مايعرفش
ومن بعد ترشو عليه شوية ملح ميش بزاف وكيما يقولو عينك ميزانك
بعد ما يسخن هاداك الغرس ويتقلى شوية مع هاداك الملح من بعد كسرو عليه قيس 10بيضات وتخلطوهم مع بعض وتخلوهم يتقلو
الصراحة أنا نموت عليها وإذا احترتو في المقادير بالضبط أنا عن نفسي ما نحطش مقدار معين على خاطر عيني هي ميزاني
المهم نص رطل غرس معاه 10بيضات ونتوما أكيد أذكياء ماكمش رايح تجربو نص رطل كامل لالا جربو غير شوية شوية حتى لي تصلحلكم وتتعودو على المقدار حسب الذوق
نتاعكم لأنو كاين البعض يفضل يكون الغرس كثرمن البيض وكاين لي يحب البيض أكثر هاذي ترجع ليكم نتوما أكيد وحاجة وحدة برك كاين تاني لي يحب البيض مقلي تماما وكاين لي
يقليه نص نص كيما أنا هادي تاني ترجع للرغبة نتاعكم
وعلى فكرة هاد الأكلة اسمها "مشوش" ومشهورة في مناطق قليلة
نتمنى أنكم تجربوها وتردولي بالخبر
مي اذا مانجحتوش فيها من اول مرة لازم تحاولو حتى تنجح معاكم وتتوصلو للمقدار لي يناسب الذوق نتاعكم
موضوع: أكلة شهية أسهل مايكون 
الأحد مارس 17, 2013 7:56 pm
